మరుజన్మనైనా నీ హృది గెలవాలని

తొలిచూపులోనే నన్నాకర్షించావు
నా ప్రమేయం లేకుండానే నా జీవితంతో పెనవేశావు
మోడు వారిన జీవితంలో తిరిగి ప్రేమను చిగురింప చేశావు
అంధకార జీవితంలో ఆశల హరివిల్లై విరిసావు

నాకు తెలుసు నేను పరాధీనమని
మళ్ళీ ఓ జీవితకాలం లేటయ్యానని
కాదుకూడదంటే వెర్రిమనసు వెక్కిరించింది
ఈ జీవితానికింతే అని జోకొట్టింది

అంతలోనే మాయమయ్యావు
మరొకరి సొంతమయ్యావు
సుదూరానికి తరలిపొయ్యావు
ఓ జ్నాపకంగా మిగిలావు

ఏడేళ్ళ తర్వాత మళ్ళీ కలిసావు
జ్నాపకాల దొంతరలను కదిపావు
ఊహల ఊయలలో విహరింప చేశావు
కలల కౌగిలిలో కరిగిపొయ్యావు

తొలిసారి కరచాలనమిచ్చావు
ఆ స్పర్శతో పులకరింపజేశావు
ఈ జన్మకదే చాలనుకున్నాను
మరుజన్మవరకు వేచివుంటాను

నా ఆశ నువ్వు
నా శ్వాస నువ్వు
నా మనసు నువ్వు
నా సర్వస్వం నువ్వు

నా హృదయ మందిరంలో గుడి కట్టి పూజిస్తున్నా
మరుజన్మనైనా నీ హృది గెలవాలని నీ ప్రేమ పొందాలని
ఈ జన్మకొకింత ఊరట నీ స్నేహం
ఈ బీజం కావాలి మరుజన్మకు ప్రేమవృక్షం