చకోరంలా నిరీక్షిస్తా నీకోసం

నీ జ్ఞాపకాల నీడలో
నీ అనుభూతుల జాడలో
మైమరచిపోయా నీ మాయలో
కనులలోని నీ రూపం కనుమరుగవుతుందేమోనని
అలసిన నా కళ్ళనడుగు నిద్రలేని రాత్రులెన్నో

నువ్వంటే అంతిష్టం ఎందుకో నాకు
సమాధానం లేని ప్రశ్నే అని తెలుసు నీకు
నీ చిరు దరహాసం మళ్ళీ మళ్ళీ చూడాలని
వసంతంకై ఎదురుచూసే కోయిలనై
నీ పిలుపుకై పరితపించే తపస్వినై

నీ మనసు తలుపు తట్టి
నీ అధరాలు ఒడిసిపట్టి
చిరుగాలి స్పర్శలా నిను స్పృశిస్తా
ఆకర్షణ అని తోసివేస్తావో
ఆరాధన అని లాలిస్తావో...

చెలివో శిలవో తెలియకుంది నీ మౌనం
చెలిమి బంధమల్లుకుంది నా ధ్యానం
సర్వ జగత్తు నిదురమత్తులో సోలిపోయే వేళ
చకోరంలా నిరీక్షిస్తా నీకోసం